Vissuð þið...

...að í N1 sjoppunni í Hveragerði er búið að slökkva á pylsupottinum klukkan 7 á kvöldin??????

Þetta uppgötvaði ég í gærkvöldi eftir að ég hafði skyndilega ákveðið að skella mér á fjórgangskeppnina í Meistaradeild VÍS í Ölfushöllinni. Var farið að svengja all hressilega þegar ég var komin austur yfir hina "bráðskemmtilegu" Hellisheiði og ákvað að láta það eftir mér að næra mig aðeins áður en lengra yrði haldið. Af þessum sökum samanstóð kvöldmaturinn minn í gærkvöldi af súkkulaði, súkkulaði og meira súkkulaði.

Mótið var fínt enda ekki við öðru að búast. Höllin var kjaftfull af fólki en mér tókst samt fyrir einhverja heppni að fá sæti. Líklega má ég þakka það pylsuleysinu í Hveragerði, gat haldið beint áfram í stað þess að eyða tíma í át þar sem það er auðveldara að keyra meðan maður étur súkkulaði en pylsu. Sætið sem ég tróð mér í var alveg fremst á pöllunum, svo nálægt brautinni að ég hefði ekki þurft nema halla mér rétt aðeins fram til að ná að smella kossi á knapana þegar þeir riðu hjá. Stillti mig samt um það enda sjálfsagi mitt aðalsmerki eins og allir vita. Eftir hlé tapaði ég sætinu og mátti standa upp á endann meðan úrslitin voru en það er nú ýmislegt leggjandi á sig til að geta gónt á hross í þessum gæðaflokki. Kannski var heldur ekkert verra að standa þar sem pallarnir sem setið er á eru hvorki neitt sérstaklega rass- né bakvænir.

Þessi snillingur vann

Siggi Sig á Suðra frá Holtsmúla og var örugglega bara vel að því kominn. Þetta brokk er nú aldrei neitt sérstaklega leiðinlegt á að horfa og töltið hjá klárnum fannst mér, alla vega í úrslitunum, eiginlega bara betra en stundum áður. Hækkaði alla vega í áliti hjá mér frekar en hitt.
Ég var því bara nokkuð sátt með úrslitin, held langoftast með Sigga þegar hann er að keppa, án þess að ég geti gefið neinar frekari skýrinar á því. Þ.e. aðrar en þær að hann er líklega bara asskoti góður, sem er í sjálfu sér fínasta skýring út af fyrir sig.

Svo heillaði þessi mig dáldið mikið, þ.e. klárinn!

Náttar frá Þorláksstöðum heitir gripurinn og Hinrik Bragason reið honum í B-úrslit, þaðan upp í A og endaði í þriðja sæti ef mig misminnir ekki. Kolsvartur og fasmikill klár og sérstaklega flottur á feti, brokki og stökki. Vantar kannski aðeins meiri tilþrif á töltinu svona upp á samanburðinn í úrslitakeppni en það á vonandi bara eftir að koma. Hann er alla vega með 8,5 fyrir tölt í kynbótadómi þannig að eitthvað getur hann. Þessi hestur er undan Ófeigi frá Þorláksstöðum sem ég man einmitt eftir frá LM 2002. Faxprúður ef ég man rétt, rúmur og skrefmikill og ofsa vakur með toppeinkunn fyrir geðslag.

En svo ég dragi nú aðeins niður í þessari helvítis jákvæðni allri þá er rétt að koma líka með mynd af einum sem heillar mig eiginlega bara ekki baun

Klerkur frá Bjarnanesi heitir þessi og var reyndar í úrslitum þannig að eitthvað getur hann, ætla alls ekkert að fara að draga dómgæsluna í efa enda hef ég ekki hundsvit á þessu. Mér finnst klárgreyið bara bæði lítill og ljótur. Virkar hálsstuttur, framsettur á töltinu, faxlítill og bara ekkert spennandi í framgöngu. Kannski rétt að hafa það samt í huga að hann er líklega ekki nema á sjötta vetur og á eflaust eftir að slípast eitthvað til enn. Nokkuð flottur á brokkinu samt og það sem dýrið getur spriklað með framlöppunum á bæði brokki og stökki. Faðernið skín í gegn þar en klárinn er sem sé undan Glampa frá Vatnsleysu og margir sem mig þekkja vita svo sem mitt álit á honum:)

Til að hafa nú allt á hreinu þá skal það tekið fram að þessum myndum var mjög svo heiðarlega stolið af http://www.eidfaxi.is/ enda var sem fyrr segir um skyndiákvörðun að ræða að skreppa austur og því engin myndavél með í för.

Og með þessu hef ég svo aftur komið illilega upp um mig og sýnt það og sannað að það er ekki nóg með að ég sé að eyða hluta af mínum dýrmæta vinnutíma hér á Keldnaholtinu í að blogga heldur er ég líka búin að hanga á netinu og skoða hrossamyndir...

Anyway, nú verður tekið á því í SAS uppgjörum og töflugerð þangað til um 4-5 í dag. Þá verður haldið í Svarthamrana og sparslað og málað í miklum móð og á mettíma svo ég verði nú komin upp í Borgarnes áður en Búvest starfsfólk verður komið á hvolf oní bolluskálina. Þegar fer að grisja í botninn á skálinni verður svo skundað á þorrablót sem væntanlega verður það síðasta sem ég fer á þetta árið.

Á laugardag tekur svo sveitasælan við og svei mér þá, ég held ég hlakki bara enn meira til þess en blótsins enda búin að dvelja hér í borg óttans samfleytt í 2 vikur.

Eða öllu heldur 12 daga ef ég á að vera alveg súpernákvæm

Sveitalubbinn biður að heilsa í bili og stefnir að því að láta vita af sér fljótlega aftur

ps. Getið þið bent mér á einhverja brilliant hugmynd til að losna við vöðvabólguverki úr öxlum?? og þá meina ég eitthvað annað en að hreyfa sig meira (of erfitt), fara í sund eða heitan pott (of erfitt og of blautt) eða fara í nudd (vil ekki láta annað fólk koma við mig)