og þannig fór það

Þó að kosningastemmingin hér á bæ hafi verið í sögulegu lágmarki þá fer nú ekki hjá því að ég sé heldur súr yfir niðurstöðunni. Það er svo merkilegt að ég hafði meiri trú á íslendingum en að þeir færu í raun að kjósa í svona miklum mæli flokkinn sem ...

• virðist virkilega trúa því að við leysum okkar vandamál í einum grænum hvelli með pennastriki í Brussel


• meira að segja á það að redda atvinnumálunum hér; ég er bara svona treg að skilja ekki hvernig innganga í samband þar sem atvinnuleysi hefur á undanförnum árum - meira að segja fyrir hrun verið í þeim hæðum sem Íslendingar hafa ekki þekkt í einhverja áratugi, á að geta dregið úr atvinnuleysi hér


• (og reyndar skil ég ekki heldur hvernig á að koma í veg fyrir að vöruverð hér hreinlega hækki við upptöku evru eins og hefur sums staðar gerst þar sem sá "öllubjargandi" gjaldmiðill hefur verið tekinn upp.


• en við höfum náttúrulega þessa dásamlega góðhjörtuðu keðjur smásala sem hafa samkeppnissjónarmið alltaf ofar öllu og láta hag heimilanna ALLTAF ganga fyrir sínum
  
• meira að segja hafa að eigin sögn gengið svo langt að borga með ákveðnum vöruflokkum - bara til hagsbóta fyrir heimilin.


• við skulum þá reikna með að það sama komi til með að gilda þegar kemur að innflutningi á vörum sem framleiddar eru utan esb því þær koma til með að verða tollaðar sem aldrei fyrr eftir inngöngu)


• flokkinn sem hefur sýnt sig í að vera ekki treystandi í stjórnarsamstarfi


• sem hefur ekki landbúnaðarstefnu aðra en þá sem er skrifuð í skrifstofubákni esb - held að eina framboðið sem sýndi landbúnaðinum minni áhuga hafi verið Ástþórsflokkurinn


• sem hefur svarað allri umræðu um landbúnaðarmál með orðunum "við höfum trú á íslenskum landbúnaði blablabla".
  
• hvernig í ósköpunum er hægt að hafa svona mikla trú á að eitthvað plumi sig vel við tilteknar aðstæður án þess að hafa nokkra einustu þekkingu á því


• Þekkingarleysi samfylkingarfólks á landbúnaði var best lýst þegar ákveðinn frambjóðandi hélt því fram fyrir síðustu kosningar að "íslenskur landbúnaðar væri mjög vel samanburðarhæfur við þann NÝSJÁLENSKA
  
• En íslendingar eru nú alltaf ósköp ginkeyptir fyrir skyndilausnum þannig að þetta kemur kannski ekki alveg á óvart. Það er verst að þessi sama skyndilausna og skyndigróðaárátta er að ég held einmitt það sem kom okkur í þessar aðstæður sem við erum í núna og eðlið okkar verður það sama, innan sem utan esb.
  

Það hefði eiginlega verið skömminni skárra að VG hefði fengið ofurlítið meira af atkvæðum á kostnað sf þó að báðir hafi reyndar komist leiðinlega mikið upp með það undanfarnar vikur að gefa ekki upp hvað þeir ætli sér að gera til bjargar ríkissjóði og heimilunum (annað en esb) heldur þrugla fram og aftur um löngu liðna atburði sem vissulega geta verið krítískir og vekja upp spurningar en hafa þó engin grundvallaráhrif þegar kemur að því að meta hvort tiltekin aðferðafræði eða stefna er betur til þess fallin en önnur að skila árangri við núverandi aðstæður.

Og talandi um VG þá held ég nú bara svei mér þá að það væri ágætt að leyfa þeim að spreyta sig í stjórn aðeins lengur, þó ekki væri nema til að finna þessa peninga sem þeir eru búnir að útdeila úr ríkissjóði hér og þar undanfarna daga og vikur; peninga sem ég hélt hreinlega að væru ekki til þessa stundina. Best að fara strax að safna fyrir sköttum næsta árs.

Púff. Þetta er að verða meiri langlokan hjá mér og frekar sundurlaust. ég er eflaust samt að gleyma einhverju sem mig langaði mikið að tjá mig um og kannski komin í marga hringi en það verðu þá bara að hafa sinn gang. En þetta er alla vega bara brot af því sem er búið að vera að hrærast í kollinum á mér undanfarnar vikur þannig að kannski kemur álíka langloka síðar:)

En svona áður en ég skil alveg við pólitíkina verð ég nú eiginlega líka að koma því að að þrátt fyrir að ég telji að Sjálfstæðisflokkurinn sé sá sem best er fær um að koma okkur út úr krísunni, basic hugmyndafræðin einfaldlega hugnast mér best og virkar rökréttust og svo hefur hann gert það áður, þá vona ég alveg heitt og innilega að hann fari ekki í samstarf með sf. Það byggist á því, fyrir utan fyrrnefnda skoðun á samstarfshæfni og stefnumálum sf. (stefnuleysi) þá treysti ég mínum flokki alls ekki nógu vel í evrópumálunum.

Maður þarf víst ekkert endilega að vera 100% sammála öllu sem tiltekin stjórnmálahreyfing segir og gerir þó maður sé félagi og telji hana heilt yfir þá sem mest vit er í.

En jæja, nógur tími farinn í pólitíkina og best að fara að sinna hinni tíkinni, þ.e. þeirri sem situr á gólfinu og bítur mig í tærnar ef ég dirfist að láta þær lafa fram úr rúminu og nagar allt sem tönn á festir þess á milli.

Askja heitir þessi nýkomna sæta skvísa og er stórættuð átta vikna Border collie tík sem mér áskotnaðist um daginn og mér segir svo hugur að henni finnist ég hafa hangið nógu lengi í bælinu í bili og vilji komast út að pissa, kúka og leika:)

Nú og svo þarf að fara að drattast í húsin og sjá hvort lömbunum hafi eitthvað fjölgað í nótt. 29 stykki voru mætt í gærkvöldi og fangprósentan úr fyrsta sæðingahollinu komin yfir 50% þannig að ég er þolanlega sátt með útkomuna enn sem komið er. Mættu samt alveg bera 2-3 í viðbót úr því holli þannig að hlutfallið næði 2/3.

Þetta er lambakóngurinn. Einlembings Dökkvasonur undan gamalli rollu . Auk Dökkva eru komin lömb undan Púka, Prjóni, Fannari að mig minnir og svo Hylssyninum sem ég man ekki hvað heitir

Næsta holl ætti svo að fara að bera upp úr helginni og ég vonast náttúrulega eftir að fangprósentan verði ekki minni í því þannig að það er nóg að sýsla enda eins og vanalega 100 hlutir sem eftir er að gera fyrir sauðburð þegar hann brestur á. Held það sé alltaf að verða styttra á milli jóla og sauðburðar - og það alveg jafnt þó að dagsetningarnar á þessum tveimur stórviðburðum séu þær sömu ár frá ári.

Nóg komið af kjaftæði. Takk fyrir innlitin þið sem kíkið við, sérstaklega Gerða og Gunna Stína, var mikið hissa að sjá komment frá ykkur en bráðskemmtilegt var það:)

Ég er náttúrulega alltaf á leiðinni að vera duglegri að blogga en hvort efndirnar á því verða eitthvað betri núna en vanalega skal ég ósagt látið.

Sumarkveðjur úr snjókomu og þoku í Víðidalstungunni

Hann er alltaf skemmtilegur...

...þessi 1. apríl.
Ísbjarnargröf í Skagafirði, ævagamlar dráttarvélar milljónavirði á suðurlandi og margt fleira bráðskemmtilegt.

Sjálf gat ég ekki annað en farið af stað með hálfgerðri tortryggni þegar við pabbi vorum boðuð í smalamennskur eftir hádegið í gær og verið viðbúin hinu versta. Þar var hins vegar ekki um gabb að ræða og 6 óþekkar skjátur náðust loks í aðhald á Bakka eftir veturlanga dvöl á blessaðri Tungunni. Það var nú samt ekki svo vel að við ættum neitt af þeim eins og ég hálfpartinn reiknaði með, þannig að þetta var kannski hálfpartinn aprílgabb, þ.e. hvað okkur varðar.
Flokkurinn samanstóð af þremur ám og þremur lambhrútum (pössuðu sig á að láta ekki sjást til sín fyrr en daginn eftir páskaslátrun!) og var bara í furðu góðu standi miðað við aðstæður. Kemur svo sem ekki sérstaklega á óvart því annað eins gósenland og blessuð Tungan finnst náttúrulega ekki og veðurblíða Víðidalsins annáluð:)
En að öllu gamni slepptu þá má svo sem minna á að vetrarbeit á þessu svæði var mikil búbót fyrir víðdælska bændur fyrr á tíð og því ekkert nýtt að fé geti þrifist þokkalega meira og minna á brokinu yfir vetrartímann. Hins vegar var féð nú kannski ekki alveg látið sjálfrátt um það á þeim tíma hvort og hvernig það nýtti þessi hlunnindi.

En sem sagt, nú sit ég á skrifstofu á Keldnaholtinu og bý mig undir að reyna að telja leiðbeinandunum trú um að ég hafi eitthvað unnið í verkefninu mínu á undanförnum dögum og vikum, dögum og vikum sem satt best að segja hafa meira farið í utanlandsferðir og búfjáreftirlit.
Sigríður systir hefur gert utanlandsferðinni skil á sínu bloggi og búfjáreftirlitið er trúnaðarmál og verður því ekki meira um þetta tvennt fjallað hér.

Ef einhver er að velta fyrir sér af hverju ég hef ekkert skrifað um niðurstöður fósturvísatalningarinnar þá eru ástæðurnar aðallega tvær.

a: krónísk geðvonska og leti
b: niðurstöðurnar voru bara hreint ekki eins góðar og ég hafði verið að gera mér vonir um. Rétt sleppum í svipaðan heildarlambafjölda og í fyrra (alla vega ef ekki láta margar) og það getum við þakkað gemlingunum sem fengu greinilega afkastameiri hrúta núna en í fyrra.

Gersemarnar mínar á myndunum í síðustu færslum stóðu aftur á móti að sjálfsögðu fullkomlega undir væntingum. Djásnið fær líka verðlaun við hæfi í hvert skipti sem ég álpast í húsin og í næstu kró stendur svo dóttir hennar, Ljúfsdóttir frá Ytri Skógum, upp á endann og mænir á mann með álíka bænarsvip og fær jú vissulega stundum aukabita svona til samlætis. Flekka gamla hefur held ég sjaldan verið feitari og fallegri en núna þrátt fyrir að framtennurnar séu allar horfnar og geri ég því ráð fyrir gríðarfallegum svartflekkóttum ásetningsgimbrum úr henni í haust.
Jæja, nóg í bili enda er rétt að koma matur og ekki má ég nú missa úr máltíð. Gæti tapað einhverju af þessum dásamlegu aukakílóum sem ég er búin að bæta á mig í vetur.
Eftir hádegi ætla ég að láta verkefnið eiga hug minn allan en það verður að viðurkennast að hann hvarflar alltaf meira og meira í fjárhúsin eftir því sem nær líður vorinu. Það styttist líka í að það fari að koma í ljós hvort eitthvað hafi haldið af þessum 86 ám sem ég sæddi í desember. Þær fyrstu eiga tal upp úr 20. apríl og náttúrulega fjöldamargt sem eftir er að gera fyrir þann tíma

Sveitalubbinn kveður og minnir að sjálfsögðu á að kvittun fyrir innliti er alltaf vel þegin þó að innlit í eigin persónu í Víðidalstungunni sé náttúrulega enn skemmtilegra. Nú og svo er sjálfsagt að benda á að annað kvöld, að loknu fjórgangsmóti í Hvammstangahöllinni, verður hægt að fylgjast með liði Víðdælinga hampa 1. verðlaunum í Húnvetnsku liðakeppninni. Ég stefni náttúrulega á að fylgjast með þeim mikla viðburði og bíð spennt