Þessi tækni...

... nú á tímum getur verið varasöm. Alls staðar leynist myndatökubúnaður, gjarnan dulbúinn sem tæki til einhverra allt annarra nota þannig að ómögulegt er að forðast hann. Með einni lítilli fingurhreyfingu getur afraksturinn svo verið kominn landa- og heimsálfa á milli á sekúndubroti. Maður er hvergi öruggur.....


Myndin sem fylgir hér með var reyndar tekin fyrir töluvert mörgum sekúndubrotum síðan og er bara búin að ferðast milli landa en ekki heimsálfa. Hún var hins vegar vissulega tekin á stafræna myndavél, dulbúna sem Nokia 5140i farsíma, og því ómögulegt fyrir fórnarlambið að vera viðbúið myndatökunni eða forða sér.

Að dagurinn í dag er valinn til birtingar á sér hins vegar einkum þá skýringu að fórnarlambið fagnar afmælisdegi sínum í dag, vonandi þó í betra veðri en var á fæðingardeginum sjálfum fyrir 64 árum síðan. Önnur líkleg skýring er sú að ritarinn nennir ekki að lesa sameindaerfðafræði og finnur sér því flest annað til dundurs.






Myndin var tekin í Kaupmannahöfn fyrir tæpum tveimur mánuðum síðan og ég reikna fastlega með því að flest ykkar kannist við manninn og þekkið hans skoðanir á ýmsum málefnum. Þrátt fyrir takmörkuð myndgæði úr Nokia 5140i má sjá, ef vel er að gáð, að í glasinu er gullinn vökvi og á glasið er stimplað velþekkt vörumerki, grænt að lit...
Já, það getur greinilega ýmislegt gerst þegar fólk er sloppið út fyrir sjón(auka)svið nágrannanna í Víðidalnum:)
En um þessa mynd verður ekki rætt nánar. What happens in Köben stays in Köben (eða svoleiðis, hnjehnjehnjehnje).


Fórnarlambið fær hins vegar heimsins mestu og bestu afmæliskveðjur og verður, sem sárabót fyrir myndbirtinguna, knúsaður vel og lengi eftir 47 daga eða svo (ekki það að neinn sé að telja svo sem:)


Annars bara allt meinhægt úr Kaupinhafn. Búin að kjósa og atkvæðið lagt af stað í Borgarfjörðinn svo það verður ekki aftur snúið með það og vonandi hætti ég þá að fá helvítis samfylkingarbréfin sem íslendingafélagið er að miðla um póstlistana með reglulegu millibili. Kólnandi veðurfar (eiginlega frekar sátt með það) með rigningu úr heiðskíru lofti, a la Ísland, og manndrápshagléli. Heppin ég að vera ekki úti að skokka þegar sú demba kom... Verst við þetta veðurfar er að ég er skíthrædd um að því eigi eftir að fylgja þrumur og eldingar í kvöld en vonum bara það besta.


Nóg í bili, ætla að snúa mér að lestrinum þar til um níuleitið í kvöld þegar ég fer að gæða mér á íslenska heimareykta hangikjetinu mínu meðan ég horfi á fréttirnar. Vonandi verður eitthvað annað en kosningaumfjöllun í þeim, nenni ekki meiru af svoleiðis. Kannski maður hæti bara að horfa á fréttirnar, neeeii, ekki alveg að sjá það gerast.
Mætti að mínu áliti alveg taka upp frönsku aðferðina með að gefa kjósendum frið frá skoðanakönnunum og áróðri einhvern ákveðinn tíma fyrir kosningar og leyfa þeim að gera upp hug sinn í friði. Bara hafa þennan tíma töluvert lengri en sólarhringinn eina sem Frakkarnir fá, ein eða tvær vikur væri hæfilegur tími og jafnframt ætti ekki að láta umfjöllunina og kannanirnar byrja fyrr en frestur til að skila inn listum er runninn út. Fólk á að kjósa út frá mönnum og málefnum framboðanna en ekki út frá líkum á hinu eða þessu stjórnarsamstarfinu miðað við hina eða þessa niðurstöðu.

Sveitalubbinn biður að heilsa í bili

(ps. ef þið sjáið prentvillur/stafsetningarvillur í þessu ekkert vera að benda á það, er búin að marglesa þennan teksta yfir og finn alltaf einhverjar nýjar villur og núna er ég hætt)

algjör snilld...

Ég veit ekki hvað þið sem skoðið síðuna mina gerið mikið af því að kíkja á síðurnar sem ég er með hlekki á hérna til hliðar en núna skuluð þið öll sömul alveg endilega kíkja á síðuna hennar Ingveldar.
Þetta er alveg hreint ótrúlega fyndið og spurning hvort þarna sé komið nýtt sóknarfæri fyrir íslenska sauðfjárbændur, alla vega þá sem eru með kollótt fé

Kveðja
Sveitalubbinn í hláturskasti:)

landbrugsavisen

....virkar fínt þegar maður er andlaus og nennir ekki að blogga neitt sem krefst umhugsunar en langar að blogga samt. Kemur oft eitt og annað þar sem mér finnst skemmtilegt og/eða áhugavert.

Má svo sem vel vera að Bændablaðið hafi verið á undan mér með þessa frétt eins og þessa um nautasæðishárkúrinn en læt hana flakka hérna inn samt.

Vegarollur eru sem sagt víðar vandamál en á Íslandi en þarna virðist vandamálið ekki vera að það sé keyrt á rollurnar heldur að þær klára saltið sem þjónar þá vitanlega ekki lengur hlutverki sínu sem hálkueyðir (eða þannig skilur mín takmarkaða dönskukunnátta þetta).
Frekar fáránlegt dæmi samt því við hverju býst fólk eiginlega þegar það er blandað melassa saman við saltið, þetta er eins og að auglýsa frían bjór einhvers staðar þar sem er ekki er talið æskilegt að Óðinn og Unnsteinn láti sjá sig. Ekki rétta leiðin til að halda skepnum frá vegunum sem sagt.
Hann hefur pottþétt ekki verið með mikla þekkingu á skepnum sá sem fann upp á þessari snilldarlausn...

Ekki það að það þarf svo sem engan melassa til að fé vilji sleikja salt af vegum en hann bætir alla vega ekki ástandið.

Svo finnst mér þessi líka dáldið góð. Engin spurning að mannræfillinn hefði aldrei reynt þetta nema af því að þetta var DANSKT bacon, ekkert annað bacon gæti mögulega verið áhættunnar virði...
Það eru greinilega fleiri en Íslendingar sem eru sannfærðir um að þeir framleiði bestu landbúnaðarvörur í heimi.
Alla vega sat ég í tvo klukkutíma í dag og hlustaði á forsvarsmann danskra kjötframleiðenda útskýra af hverju danskt svínakjöt er betra en svínakjöt annars staðar úr heiminum. Ég ætla svo sem ekkert að taka neina afstöðu til þess hvort það sé rétt. Mér finnst svínakjöt tæplega vera mannamatur fyrr en það er búið að salta það og reykja hæfilega mikið og eftir svo mikla meðhöndlun efast ég um að maður finni mikinn bragðmun eftir því hvar svínið var ræktað.
Það skal þó viðurkennt að það er að mínu mati alltaf plús ef maður getur verið nokkuð viss um að svínið hafi verið alið við sæmilega "svínúðlegar" aðstæður og ekki verið fóðrað með miklu magni af erfðabreyttu fóðri, hormónum né lyfjum þó það komi ekki endilega fram í bragðgæðum. Þannig að ef danskurinn hefur rétt fyrir sér í því að fyrrnefnd atriði séu undir betri control og strangari löggjöf hér en víðast annars staðar þá get ég alveg tekið undir að danskt svínakjöt sé betra en annað.

Ljósi punktur dagsins er að svínafyrirlestrunum í skólanum er lokið í bili en þó gætuð þið enn átt von á bloggi um svínakjöt þar sem ég er enn ekki búin að hafa það af að klára að éta svínshelvítið sem mér áskotnaðist um daginn. Er að safna kjarki í næsta skammt og það gæti vel orðið tilefni til bloggs þegar þar að kemur. Eða alla vega þegar síðasti skammturinn verður kláraður og ég get farið að éta kjöt aftur:)

Segjum þetta gott í bili
sveitalubbinn býður góða nótt úr svínslegum vornæðingnum í Köben

ps. Verð að monta mig af því að ég skilaði skattframtalinu mínu rúmum klukkutíma áður en almennur framtalsfrestur rann út í gærkvöldi og var samt búin að tryggja mér frest til 28. mars. Ekki oft sem það gerist að ég klári eitthvað og skili fyrr en ég nauðsynlega þarf...

ykkur til fróðleiks og skemmtunar...

....þá eru þetta og þetta tvær góðar ástæður fyrir því að ég ætla ekki að ná mér í danskan kall. N.b. þetta er alla vega þriðji Daninn sem stútar kellingunni sinniá Á ÞESSU ÁRI. Hættulegur þjóðflokkur sem sagt. Kannski rétt að taka það fram svona í framhaldi af þessu að ég er svo sem ekkert á leiðinni að ná mér í kall yfirleitt, er bara alltof löt manneskja til að nenna að standa í svoleiðis veseni ;o)

Og enn úr fréttum en þetta eru klárlega sorgartíðindi dagsins. Hvernig geta þeir hjá ruv gert mér, einhverjum tryggasta hlustanda/áhorfanda sem um getur, þetta. Maríanna ég verð fastagestur hjá þér annan hvern sunnudagsmorgnum (og stundum aðfaranætur sunnudaga) á næsta ári.

Uppáhalds í dag er tréð í garðinum í næsta húsi. Veit ekki hvað það heitir en það er með breiða krónu sem er alsett af litlum og fallegum hvítum blómum þó að tréð sé enn ekkert farið að laufgast. Alveg hrikalega flott. Kannski kominn tími til að ég fyndi eitthvað fleira jákvætt við Danmörku en Carlsberginn:)

Ætli ég láti þetta ekki duga í bili. Var að hugsa um að láta fylgja með lista yfir hluti sem mig langar í eða langar að gera (ekki það að það komi ykkur nokkuð við) en það hefði orðið svo langur listi að ég læt það eiga sig, enda alveg tilgangslaust að velta sér upp úr því.
Fariði vel með ykkur og passið ykkur á Dönunum:)

kv
Óskin í Köben með óskalistann sinn

Endrum og eins....

...kíki ég á aðra fjölmiðla en þá íslensku og er það þá helst meðan ég skófla upp í mig morgunmatnum. Eins og gefur að skilja eru það þá morgun-fríblöðin Dato og 24 timer sem verða fyrir valinu hjá fátækum námsmanninum (baugstíðindin eru ekki borin hingað í húsið; myndi nú svosem ekkert taka þau fram yfir fyrrnefndu blöðin - þjóðremban nær ekki til alveg hvers sem er þó það sé íslenskt).

Það verður víst að viðurkennast að yfirleitt eru það ekki helstu tíðindi úr dönsku þjóðfélagi eða stjórnmálum sem mestum tíma er eytt í að lesa, enda fjalla yfirleittbæði ruv og mbl um það markverðasta á því sviði. Hins vegar fær ýmiss konar slúður, myndasögur og fréttir af kjánalegum uppgötvunum eða atburðum víðs vegar að úr heiminum mun meiri athygli. Sveitalubbinn les t.d. allar fréttir af kóngafólkinu staf fyrir staf. Enda hefur það sýnt sig að það marg borgar sig. Ég veit t.d. núna, þökk sé reikningshæfileikum og líffræðiþekkingu blaðamanna á fyrrnefndum blöðum, nákvæmlega hvaða dag væntanlegur prins/prinsessa var getin(n). Og reyndar líka ca klukkan hvað, þar sem faðirinn var víst að sinna einhverjum embættisskyldum sem kröfðust veru á almannafæri að morgni þess dags og því nokkuð ljóst að grislingurinn hlýtur að hafa komið undir seinni partinn.

Fyrir utan fréttir af kóngafjölskyldunni þá er baksíðan á dato orðin í sérstöku uppáhaldi hjá mér. Þar er miðlað hinum og þessum mjög misgóðum og gagnlegum en oft á tíðum afar skemmtilegum húsráðum, auglýsingum og fróðleik sem mér sýnist yfirleitt fenginn héðan og þaðan af internetinu. Held það sé afar skemmtilegt starf að vera blaðamaður fyrir þennan dálk:)

Alla vega, þá voru í gær á fyrrnefndri síðu gefin nokkur góð ráð til para sem hafa hug á að fjölga mannkyninu. Ástæðan fyrir að þessar ráðleggingar eru dregnar upp og uppfærðar núna er víst að einhver ráðherra var að hvetja Dani til að eiga fleiri börn, fara sem sagt upp í þrjú í staðinn fyrir tvökommaeitthvað. Ég verð nú að segja að fyrir minn smekk er nú alveg fjandans nóg af fólki hérna en ef þetta átak gæti orðið til að fjölga afgreiðslufólki í matvörubúðunum með tíð og tíma, þannig að raðirnar fari að meðaltali ekki mikið upp fyrir 20 manns, þá er það nú kannski alveg þess virði. Reyndar ætla ég svo sannarlega ekki að búa hérna enn þegar afrakstur átaksins verður farinn að ná upp fyrir búðarkassana en það er önnur saga. En ráðin voru sem sé þessi og lesi nú vel og vandlega þeir sem hafa hug á að eignast erfingja - hinir geta reyndar ekki síður haft gagn af :

• Manden må aldrig gå i bad - i hvert fald ikke varme karbade
• Manden må ikke gå i stramme bukser (så mister kvinden lyst til sex)
• Kvinden må ikke være for fuld (men hun må godt læse i Hjemmet imens)
• Manden skal huske at bruge den pæne indgang, der hvor måtten engang lå foran.
• Motionér ikke for meget - manden kan ikke fölge med
• Vil du have en pige, brug missionærstillingen

Mér finnst þetta númer tvö best og svoooooo satt. Held alla vega að hvað mig varðar þá finnist ekki betri getnaðarvörn en þröngar niðurmjóar buxur á karlmönnum. Sérstaklega ef það fylgja þeim támjóir skór. Ef viðkomandi eyðir svo í ofanálag meiri tíma á dag í hárið á sér en ég geri er vörnin fullkomnuð.

En nóg um það.

Ég ætla að enda þessa færslu á að tilkynna að ég á bestustu fjölskyldu í heiminum:) Þau eru öll sömul að undirstrika það enn einu sinni í vetur með að vera svona dugleg að heimsækja mig. Mamma kom í haust, Ragnheiður systir og kallinn hennar fyrir jólin, Sigríður systir í janúar og á morgun eru pabbi, mamma og Sigríður öll að koma út og verða fram yfir helgi.

Bókalestri, bloggi og öðru daglegu amstri og áhyggjum verður því ýtt samviskusamlega til hliðar næstu dagana og túristastemmingin dregin fram.

Og með það býður Sveitalubbinn góða nótt;o)